مشروع تخرج لكشف اسرار بلاد الذهب
«إترونوبيا» منصة رقمية دشنها طلاب من الدفعة الـ50 بكلية الإعلام جامعة القاهرة، وتحديداً أول دفعة تتخرج من قسم «منصات رقمية»، اشترك فى تنفيذها نحو 21 طالباً، ليلقوا الضوء على العادات النوبية وثقافاتها المتوارثة، تلك الفكرة التى تحمست لها مريم عمرو رفقة زملائها وتحكى عنها: «إترو بمعنى النيل ده فى اللغة المصرية القديمة، ونوبيا مشتقة من نوب بمعنى الدهب، فبالتالى إترونوبيا بتجمع بين التراث المصرى القديم والهوية النوبية المميزة، وده محور فكرتنا، إننا عايزين نبرز التراث النوبى ونقدمه للناس بشكل مختلف عن طريق قصص واقعية لناس نوبيين بيحفظوا تراث بلدهم وبسببهم هو لسه عايش لحد دلوقتى».
حكاية الرحلة 97
تضم المنصة برنامجاً مرئياً يحمل اسم «رحلة 97»، وتفسر مريم سر هذا الرقم وماهيته: «(97) ده الكود الأرضى الخاص بمحافظة أسوان، حبينا يكون الاسم مختلف وله علاقة بالبلد، عبارة عن 5 حلقات vlogs اتكلمنا فى كل حلقة عن موضوع مختلف من خلال شخصية بتجسد الموضوع ده زى حلقات اختلفت بين الصيد وحب النوبيين للنيل وبين الفلكلور النوبى المميز والعادات والتقاليد».
وتشمل فكرة الطلاب فى مشروع تخرجهم برنامج بودكاست اسمه (أمبيسا) بمعنى «صاحبى» وهى كلمه نوبية مشهورة: «بنتكلم عن اللغة النوبية من خلال أغانى محمد منير باعتباره من أشهر الفنانين اللى بيغنوا نوبى وواحد من الناس اللى كانت سبب إن اللغة النوبية تفضل موجودة لحد دلوقتى، عملنا 3 حلقات بأغانى مختلفة بنسمع سوا الأغنية وبنترجمها وبنحكى القصه اللى وراها».
ودمج الطلاب بين المقالات والتناول التفاعلى من خلال «المدونة» داخل المنصة: «بنتكلم فيها عن الأكلات والمعمار والموسيقى النوبية».
